ಉಗುರು ಕಚ್ಚುವ ಅಭ್ಯಾಸ ಸಾಮಾನ್ಯವಾಗಿ ಹೆಚ್ಚಿನವರಲ್ಲಿ ಕಂಡುಬರುವುದು. ಆಡುಭಾಷೆಯಲ್ಲಿ ಉಗುರು ಕಚ್ಚುವ ವ್ಯಕ್ತಿ ಬಹಳ ಬುದ್ಧಿವಂತ ಎಂಬ ಮಾತಿದೆ. ಆದರೆ, ಈ ಅಭ್ಯಾಸ ದೈಹಿಕ ಹಾಗೂ ಮಾನಸಿಕ ಆರೋಗ್ಯಕ್ಕೆ ಎಷ್ಟು ಹಾನಿಕಾರಕ ಎಂದು ತಿಳಿದಿದೆಯೇ?..
ಹೌದು, ಅಮೇರಿಕನ್ ಸೈಕಿಯಾಟ್ರಿಕ್ ಅಸೋಸಿಯೇಷನ್ (APA) ಪ್ರಕಾರ, ಉಗುರುಗಳನ್ನು ಕಚ್ಚುವ ಈ ಪ್ರವೃತ್ತಿಯು ಸ್ವಯಂ ಪ್ರಚೋದಿತ ಪುನರಾವರ್ತಿತ ಪ್ರಕ್ರಿಯೆಯಾಗಿದೆ.
ಎಪಿಎ ಪ್ರಕಾರ, ಇದು ವ್ಯಕ್ತಿಯ ಮನಸ್ಸಿನಲ್ಲಿ ಅನಗತ್ಯ ಆಲೋಚನೆಗಳು ಮತ್ತು ಪ್ರಚೋದನೆಗಳಿಂದ ಬರುವ ಅಸ್ವಸ್ಥತೆಯಾಗಿದೆ ಎಂದು ಹೇಳಿದೆ. ಆದ್ದರಿಂದ ಉಗುರು ಕಚ್ಚುವ ಅಭ್ಯಾಸಕ್ಕೆ ವಿದಾಯ ಹೇಳುವುದು ಬುದ್ಧಿವಂತರ ಲಕ್ಷಣ. ಈ ಕುರಿತ ಇನ್ನಷ್ಟು ಮಾಹಿತಿ ನಿಮಗಾಗಿ.
ಉಗುರು ಕಚ್ಚುವ ಅಭ್ಯಾಸಕ್ಕೆ ಕಾರಣವೇನು?:
ಉಗುರುಕಚ್ಚುವ ಅಭ್ಯಾಸವನ್ನು ವೈದ್ಯಕೀಯ ಭಾಷೆಯಲ್ಲಿ ಒನಿಕೊಫೇಜಿಯಾ ಎಂದು ಕರೆಯಲಾಗುತ್ತದೆ. ಉಗುರು ಕಚ್ಚುವ ಅಭ್ಯಾಸಕ್ಕೆ ಹಲವು ಕಾರಣಗಳಿವೆ. ಅದರಲ್ಲಿ ಆನುವಂಶಿಕ ಅಂಶಗಳೂ ಸೇರಿವೆ. ಇದು ಮಾನಸಿಕ ಸ್ಥಿತಿಯಾಗಿದ್ದು, ಒಬ್ಬ ವ್ಯಕ್ತಿಯು ಆತಂಕ ಅಥವಾ ಚಡಪಡಿಕೆಯ ಸ್ಥಿತಿಯನ್ನು ಎದುರಿಸಿದಾಗ, ಅದನ್ನು ನಿಭಾಯಿಸಲು ತನ್ನ ಉಗುರುಗಳನ್ನು ಕಚ್ಚಲು ಪ್ರಾರಂಭಿಸುತ್ತಾನೆ. ಉಗುರು ಕಚ್ಚುವುದರಿಂದ ಒತ್ತಡ, ಉದ್ವೇಗ ಮತ್ತು ಬೇಸರ ನಿವಾರಣೆಯಾಗುವುದು ಎಂದು ಕಂಡುಬಂದಿದೆ. ಸಾಮಾನ್ಯವಾಗಿ ಒಂಟಿತನ, ಹಸಿವು ಹಾಗೂ ಒತ್ತಡದಿಂದ ಇರುವ ವ್ಯಕ್ತಿಗಳು ಉಗುರು ಕಚ್ಚುವ ಅಭ್ಯಾಸವನ್ನು ಹೊಂದಿರುತ್ತಾರೆ.
ಉಗುರು ಕಚ್ಚುವುದರಿಂದ ಆಗುವ ಹಾನಿಯೇನು?:
ಉಗುರು ಕಚ್ಚುವಿಕೆಯು ಆರೋಗ್ಯಕ್ಕೆ ಹೆಚ್ಚಿನ ಅಪಾಯವನ್ನುಂಟುಮಾಡುವ ಅನೇಕ ಹಾನಿಗಳನ್ನು ಉಂಟುಮಾಡಬಹುದು. ಮೊದಲನೆಯದಾಗಿ, ಇದು ಮಾನಸಿಕ ಸಮಸ್ಯೆಗಳಿಗೆ ಕಾರಣವಾಗಬಹುದು. ಇವರಲ್ಲಿ ಅವಮಾನದ ಭಯ ಮತ್ತು ಭಾವನಾತ್ಮಕ ನೋವಿನ ಭಾವನೆ ಇರುತ್ತದೆ, ಇದರಿಂದಾಗಿ ವ್ಯಕ್ತಿಯು ದುಃಖದ ಸ್ಥಿತಿಯಲ್ಲಿರುತ್ತಾನೆ. ಅದೇ ಸಮಯದಲ್ಲಿ, ಅವನು ಸಾಮಾಜಿಕ ದೌರ್ಬಲ್ಯಗಳಿಗೆ ಬಲಿಯಾಗುತ್ತಾನೆ.
ಇದಲ್ಲದೆ, ಉಗುರುಗಳನ್ನು ಅಗಿಯುವುದರಿಂದ ಅನೇಕ ರೀತಿಯ ಸೋಂಕುಗಳ ಅಪಾಯವಿದೆ. ಉಗುರುಗಳನ್ನು ಅಗಿಯುವುದರಿಂದ, ಉಗುರು ಮತ್ತು ಸುತ್ತಮುತ್ತಲಿನ ಮೃದು ಅಂಗಾಂಶಗಳಲ್ಲಿ ಸೋಂಕು ಸಂಭವಿಸುತ್ತದೆ. ಇದರಿಂದಾಗಿ ಹೊಟ್ಟೆಯೊಳಗೆ ಪರಾವಲಂಬಿಗಳು ಬರುವ ಅಪಾಯವಿದೆ. ಇದು ಹೊಟ್ಟೆಗೆ ಸಂಬಂಧಿಸಿದ ಸಮಸ್ಯೆಗಳನ್ನು ಉಂಟುಮಾಡುತ್ತದೆ. ಹೊಟ್ಟೆಯಲ್ಲಿ ಊತವೂ ಇರಬಹುದು.
ಇದರ ತಕ್ಷಣದ ನೇರ ಪರಿಣಾಮ ದವಡೆಯ ಮೇಲೆ ಬೀಳುತ್ತದೆ. ನಿರಂತರ ಸೋಂಕಿನಿಂದ, ದವಡೆಯಲ್ಲಿ ನೋವು ಬರುತ್ತದೆ. ಒಸಡುಗಳಿಗೆ ಗಾಯವಾಗುವ ಅಪಾಯವಿದೆ. ಇದು ಹಲ್ಲು ಮತ್ತು ಬಾಯಿಗೆ ಹಾನಿ ಮಾಡುತ್ತದೆ. ಇದೆಲ್ಲದರ ನಡುವೆ, ಬ್ಯಾಕ್ಟೀರಿಯಾ ಮತ್ತು ಶಿಲೀಂಧ್ರಗಳ ದಾಳಿ ತೀವ್ರಗೊಳ್ಳುತ್ತದೆ.
ಈ ಅಭ್ಯಾಸವನ್ನು ಹೇಗೆ ತ್ಯಜಿಸುವುದು?:
ಉಗುರು ಕಚ್ಚುವ ಅಭ್ಯಾಸವನ್ನು ಹಲವು ರೀತಿಯಲ್ಲಿ ಹೋಗಲಾಡಿಸಬಹುದು. ಅವುಗಳೆಂದರೆ:
- ಮೌತ್ ಗಾರ್ಡ್ ಹಾಕಿಕೊಳ್ಳುವ ಮೂಲಕ ಈ ಅಭ್ಯಾಸವನ್ನು ತೆಗೆದುಹಾಕಬಹುದು.
- ಎರಡನೆಯದಾಗಿ, ಉಗುರುಗಳಿಗೆ ತೀಕ್ಷ್ಣವಾದ ಅಥವಾ ಕಹಿಯಾದ ವಸ್ತುವನ್ನು ಲೇಪಿಸುವ ಮೂಲಕ ಮತ್ತು ನೇಲ್ ಪಾಲಿಷ್ ಹಚ್ಚಿಕೊಳ್ಳುವ ಮೂಲಕ ಈ ಅಭ್ಯಾಸಕ್ಕೆ ಬೈ ಹೇಳಬಹುದು.
- ಉಗುರುಗಳಿಗೆ ಕಹಿ ಎಣ್ಣೆಯನ್ನು ಹಚ್ಚುವ ಮೂಲಕವೂ ಉಗುರುಗಳನ್ನು ಜಗಿಯುವ ಅಭ್ಯಾಸವನ್ನು ತೆಗೆದುಹಾಕಬಹುದು.
- ನಿಮ್ಮ ಉಗುರುಗಳನ್ನು ಯಾವಾಗಲೂ ಚಿಕ್ಕದಾಗಿ ಮತ್ತು ಸ್ವಚ್ಛವಾಗಿಡಿ.
- ರಾತ್ರಿ ಹೆಚ್ಚು ಉಗುರು ಕಚ್ಚುವ ಅಭ್ಯಾಸ ನಿಮಗಿದ್ದರೆ ರಾತ್ರಿ ಮಲಗುವಾಗ ಕೈಗೆ ಗ್ಲೌಸ್ ಹಾಕಿಕೊಳ್ಳಿ.
- ಉಗುರುಗಳನ್ನು ಜಗಿಯುವ ಬದಲು, ಯಾವಾಗಲೂ ಬಾಯಿಯಲ್ಲಿ ಚೂಯಿಂಗ್ ಗಮ್ ಅಥವಾ ಸೋಂಪು ಬೀಜ ಅಗಿಯಿರಿ.
- ಈ ಅಭ್ಯಾಸಗಳಿಂದ ಸಹ ಹೋಗದಿದ್ದರೆ, ನಂತರ ವೈದ್ಯರನ್ನು ಸಂಪರ್ಕಿಸಿ.
