ತುಳುಕು ಅಧಿಕೃತ ಸರ್ಕಾರಿ ಸಂಸ್ಥೆ ಆದುಪ್ಪುನ ಕರ್ನಾಟಕ ತುಳು ಸಾಹಿತ್ಯ ಆಕಾಡೆಮಿದ ಗುರ್ಕಾಲೆನ ತಾನ ಎಂಕ್‌ ಬೊಡ್ಚಿ ಪಂದ್‌ ಅಕಾಡೆಮಿದ ಮಾಜಿ ಅಧ್ಯಕ್ಷೆರ್‌, ಕಾಂಗ್ರೆಸ್‌ ದ ಹಿರುಯ ನಾಯಕೆರ್‌ ಎ.ಸಿ.ಭಂಡಾರಿ ತೆರಿಪಾದೆರ್.
ಇತ್ತೆ ಅಖಿಲ ಭಾರತ ತುಳು ಒಕ್ಕೂಟದ ಗುರ್ಕಾರ್ರೆನ ಮಣೆಟ್ಟ್‌ ಕುಲ್ದಿನ ಎ.ಚಂದ್ರಶೇಖರ ಭಂಡಾರಿ ಮೇರ್‌,ಒಕ್ಕೂಟನ್‌ ಗಟ್ಟಿ ಮಲ್ದಿನ ಉದ್ದೇಶ ಅಂಚನೆ ಅನಾರೋಗ್ಯದ ನಿಲೆಟ್ಟ್‌ ತುಳು ಅಕಾಡೆಮಿದ ಗುರ್ಕಾಲೆನ ಪಟ್ಟದ ಪಟ್ಟಿಡ್ದ್‌ ಪಿರ ಬೈದೆರ್.
ತುಳುವೇ ಎನ್ನ ಬದ್‌ಕ್, ಉಸುಲು ಅಂಚಾದ್‌ ಅನಾರೋಗ್ಯ ಇತ್ತ್‌0ಡಲಾ ಒಕ್ಕೂಟದ ಮುಖೇನ ತುಳು ಭಾಷೆಗಾದ್‌ ಕೆಲಸ ಮಲ್ಪುವೆ.ತುಳು ಅಕಾಡೆಮಿಗ್‌ ಒಂಜಿ ಎಡ್ಡೆ ಮನಸ್‌ ದಕುಲು ಆಯ್ಕೆಯಾದ್‌ ಬರೊಡು. ಭಾರಿ ಉಮೇದ್‌ದ ಪದುಕೆರ್ನ ಟೀಮ್‌ ಲಾ ಆಯ್ಕೆ ಆಪಿನ ವಿಶ್ವಾಸ ಎಂಕು ಉಂಡು. ಆಂಡ ಅಕಾಡೆಮಿದ ಅಧ್ಯಕ್ಷೆರ್ನ ತಾನದ ಆಸೆ ಎಂಕ್‌ ಇಜ್ಜಿ. ಕಾಂಗ್ರಸ್‌ ದ ಮುಖಂಡೆರೆಗ್‌ ಈ ವಿಷಯ ತೆರಿಪಾದ್‌ ಎನ್ನ ಉಮೇದುವಾರಿಕೆನ್ಲ ಪಿರ ದೆತ್ತ್ ದೆ ಪಂದ್‌ ಎ.ಸಿ.ಭಂಡಾರಿಲು ಪಂಡೆರ್.
ಅಕಾಡೆಮಿದ ಗುರ್ಕಾರ್ಮೆ ಒಯಿಸೋನರೆ ಸರಿ ಆಯಿನ ಜನ ತಿಕ್ಕೊಡು.ಅಕ್ಲೆಗ್‌ ದಾದ ಅರ್ಹತೆ ಉಂಡು ಪಂದ್‌ ತೂವೊಡು.ಅಯಿಟ್ಟ್‌ ಲಾ ತುಳು ಭಾಷೆ, ಸಂಸ್ಕೃತಿ ಒರಿಪರೆಗಾದ್‌ ಅಕುಲು ಮಲ್ದಿನ ಪೊರಂಬಾಟ, ಅಕ್ಲೆನ ಸೇವೆ ದಾದ ಪನ್ಪಿನೆನ್‌ ತೆರಿದ್‌ ಸರ್ಕಾರ ಆಯ್ಕೆ ಮಲ್ಪುಂಡು.ಅಂಚ ಅಧ್ಯಕ್ಷೆರ್‌ ಆಪಿನ ಆಸೆ ಮಸ್ತ್‌ ಜನಕ್‌ ಉಪ್ಪುಂಡು.
