ಮುಲ್ಕಿ : ತುಳು ಭಾಷೆ ಬೊಕ್ಕ ಸಂಸ್ಕೃತಿನ್ ಒರಿಪರೆ ಬೋಡಾದ್ 14 ವರ್ಷರ್ದ್ ದುಂಬು “ಟೈಮ್ಸ್ ಆಫ್ ಕುಡ್ಲ” ಪತ್ರಿಕೆನ್ ಪುಟ್ಟು ಪಾಡ್ದ್ 2025 ನೇ ಜನವರಿ 30 ತಾರೀಕ್ಗ್ ದೇವೆರೆ ಪಾದ ಸೇರಿನ “ತುಳುವ ನೇಸರೆ” ಬಿರ್ದ್ ಪಡೆತಿನ ಸಂಸ್ಥಾಪಕೆ, ತುಳು ಪೊರ್ಂಬಾಟಗಾರೆ ದಿ. ಶಶಿರಾಜ್ ಬಂಡಿಮಾರ್ ಮೆರೆನ ನೆಂಪು ಲೇಸ್ ಐತಾರ ಕಾಂಡೆ ಪುನರೂರು ಕಾಂಪ್ಲೆಕ್ಸ್ ಸ್ವಾಗತ್ ಹೋಟೆಲ್ದ ಚಾವಡಿಡ್ ನಡತ್ಂಡ್.
ಸುರುಕ್ಕು ಬೈದಿ ಬಿನ್ನೆರ್ ಮಾತೆರ್ಲ ದಿ. ಶಶಿರಾಜ್ ಬಂಡಿಮಾರ್ ಮೆರೆನ ಭಾವಚಿತ್ರೊಗು ಪುರ್ಪ ಪಾಡ್ದ್ ಗೌರವ ಮಲ್ತೆರ್.
ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು ಲೇಸ್ದ ಅಧ್ಯಕ್ಷತೆ ವಹಿಸ್ದಿತ್ತೆರ್. ಈ ಪೊರ್ತುಡು ಪಾತೆರ್ನ ಆರ್, ತುಳು ಬಾಷೆಗಾದ್ ಶಶಿ ಬಂಡಿಮಾರ್ ಪೊರ್ಂಬಾಟ ಮಲ್ದಿನಾರ್. ತುಳುನು ಒರಿಪಾವುನ ನಮ್ಮ ಕರ್ತವ್ಯ. ಭಾಷಾವಾರು ಪ್ರಾಂತ್ಯ ಆನಗ ತುಳುಕ್ಕು ಅನ್ಯಾಯ ಆತ್ಂಡ್. ಅವೆನ್ ಸರಿ ಮಲ್ಪರೆ ನಮ ಮಾತೆರ್ಲ ಒಟ್ಟು ಸೇರೊಡು . ನಮ್ಮ ಅಪ್ಪೆ ಬಾಸೆದ ಪತ್ರಿಕೆನ್ ಒರಿಪಾವುನ ಕೆಲಸ ಮಲ್ಪೊಡು ಪಂಡೆರ್.
ತುಳು ಲಿಪಿ ಸಾಧಕೆರ್, ಉದ್ಯಮಿ ಡಿ.ಕೆ.ಶೆಟ್ಟಿ ಪಾತೆರ್ದ್, ಬೊಂಬೈಡ್ ತುಳು ಪತ್ರಿಕೆ ಬುಳೆಯರೆ ಶಶಿಯಣ್ಣೆ ಭಾರಿ ಪ್ರಯತ್ನ ಮಲ್ದೆರ್. ಆರ್ ಸುರು ಮಲ್ದಿನ ಪತ್ರಿಕೆನ್ ನೀಂದಾವುನು ಮಾತ್ರ ಅತ್ತಾಂದೆ ಗೆಂದಾವೊಡು ಪಂಡೆರ್. ಪತ್ರಿಕೆಗ್ ಜಾಗತಿಕವಾದ್ ಬೆಂಬಲ ತಿಕ್ಕುಲೆಕ ಮಲ್ಪೊಡು ಪಂಡೆರ್.
ಯುಗಪುರುಷ ಸಂಪಾದಕೆರ್, ಭುವನಾಭಿರಾಮ ಉಡುಪ ಪಾತೆರ್ದ್, ಪತ್ರಿಕೆ ನಡಪಾವುನ ಸುಲಭದ ಬೇಲೆ ಅತ್ತ್ , ಆರ್ ಪುಟ್ಟು ಪಾಡ್ದಿನ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆನ್ ಶಾಶ್ವತವಾದ್ ಒರಿಪಾಂಡ ಅರೆನ ಆತ್ಮೊಗು ಶಾಂತಿ ತಿಕ್ಕುಂಡು ಪಂಡೆರ್.
ಲೇಖಕೆರ್ ಡಾ. ವಿ.ಕೆ ಯಾದವ್ ಪಾತೆರ್ದ್, ತುಳುವೆರೆಗ್ ಒಂಜಿ ಪ್ರತ್ಯೇಕ ಪತ್ರಿಕೆ ಬೋಡು ಪಂದ್ ಕನ ಕಟ್ಟಿನ ಇಂಜಿನಿಯರ್ ಶಶಿರಾಜ್ ಬಂಡಿಮಾರ್. ಬಾವುಟ ಗುಡ್ಡೆಡ್ ತುಳು ಬಾವುಟ ರಾಪಾವುನ ಕನ ಕಟ್ಟಿನಾರ್ ಶಶಿಯಣ್ಣೆ. ಅವೆನ್ ದುಂಬು ಕೊನೊಯಿನಾರ್ ಯೋಗೀಶ್ ಶೆಟ್ರ್ ಪಂದ್ ಪಂಡೆರ್.
ಡಾ.ರಾಜೇಶ್ ಆಳ್ವ ನಿರೂಪಣೆ ಮಲ್ತೆರ್. ಸದ್ಯೊಡು ತುಳುಕ್ಕು ಮಲ್ಲ ಮಾನಾದಿಗೆ ತಿಕ್ಕರೆ ಉಂಡು. ಅಯಿತ್ತ ಪಿರವುಡು ಶಶಿಯಣ್ಣನ ಬೆಗರ್ ಉಂಡು ಪಂದ್ ಪಂಡೆರ್. ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ವ್ಯವಸ್ಥಾಪಕಿ ಭುವನಾ ದಿನೇಶ್, ಗಜೇಂದ್ರ ಕೊಪ್ಪ ಶಶಿರಾಜ್ ಮೆರೆನ ವಿಚಾರೊನು ಪಟ್ಟೊಂಡೆರ್. ಯಶೋಧರ ಕೋಟ್ಯಾನ್ ಸ್ವಾಗತ ಮಲ್ತೆರ್. ಉದಯ ಪೂಂಜ ಸೊಲ್ಮೆ ಸಂದಾಯೆರ್. ಜೈ ತುಲುನಾಡ್ (ರಿ) ಸಂಘಟನೆದ ಸದಸ್ಯೆರ್, ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ಸಿಬ್ಬಂದಿಲು ಬೊಕ್ಕ ಶಶಿ ಬಂಡಿಮಾರ್ರೆನ ಅಭಿಮಾನಿಲು ಲೇಸ್ಡ್ ಪಾಲ್ ಪಡೆದಿತ್ತೆರ್.
😢ಕಣ್ಣೀರ್ ಪಾಡಿನ ಚಂದ್ರಶೇಖರ ಸುವರ್ಣ
ತುಳುನಾಡ ವೈಭವ ಪುಗರ್ತೆದ ರಂಗ ನಿರ್ದೇಶಕೆರ್, ಸುವರ್ಣ ಆರ್ಟ್ಸ್ದ ಚಂದ್ರಶೇಖರ ಸುವರ್ಣ ಪಾತೆರ್ದ್ ಶಶಿಯಣ್ಣನ ಒಡನಾಟದ ಬಗೆಟ್ಟ್ ಪಾತೆರ್ದ್ ಕಣ್ಣೀರ್ ಪಾಡಿಯೆರ್. ಪರದೇಶ ಸೇರ್ದ್ ಒಲ್ಪಲ ತುಳು ಕಾರ್ಯಕ್ರಮ ಆಂಡ ಅವುಲು ತುಳು ಸಾಲ್ ಪಾಡೊಡು ಪಂದ್ ಬಿನ್ನಯ ಮಲ್ತೊಂದಿತ್ತೆರ್ ಪಂದ್ ನೆಂಪು ಮಲ್ತೊಂಡೆರ್.
ಸರ್ಕಲ್ಗ್ ಶಶಿಯಣ್ಣನ ಪುದರ್ ದೀವೊಡು: ಯೋಗೀಶ್ ಶೆಟ್ಟಿ ಜಪ್ಪು ಮಲ್ಲ ಬಿನ್ನೆರಾದ್ ಬೈದಿತ್ತಿನ ತುಳುನಾಡ ರಕ್ಷಣಾ ವೇದಿಕೆದ ಸಂಸ್ಥಾಪಕೆರ್ ಯೋಗೀಶ್ ಶೆಟ್ಟಿ ಪಾತೆರ್ದ್, ತುಳು ಪಂಡ ಶಶಿಯಣ್ಣನ ಜೀವ. ತುಳುಕ್ಕು ಒಲ್ಪಲ
ಗೌರವ ತಿಕಿಜಿಡ ಬೇಗ ಸ್ಪಂದನೆ ಮಲ್ತೊಂದಿತ್ತೆರ್. ಎಂಕ್ಲೆಡ ಪಂದ್ ಪೊರ್ಂಬಾಟ ಮಲ್ಪರೆ ಸ್ಫೂರ್ತಿ ಕೊರ್ಪಿನ ಒಂಜಿ ಸೇತುವೆದ ಲೆಕ ಕೆಲಸ ಮಲ್ತೊಂದಿತ್ತೆರ್. ತುಳುತ್ತ ಕೇಪುಲ ರಂಗ್ದ ಶಾಲ್, ಕೊಡಿತ್ತ ಮಹತ್ವದ ಬಗೆಟ್ಟ್ ತೆರಿಪಾವೊಂದಿತ್ತೆರ್.ಅರೆನ ಪುದರ್ ಶಾಶ್ವತವಾದ್ ಒರಿಯೊಡ್ಡ ಒವುಲ ಒಂಜಿ ಸರ್ಕಲ್ ಗ್ ಅತ್ತ್ ಡ ತುಳು ಭವನದ ಒಂಜಿ ಚಾವಡಿಗ್ ಅರೆನ ಪುದರ್ ದೀವೊಡು ಪಂದ್ ಪಂಡೆರ್.
