ಮಂಗಳೂರು :ಉದ್ಯಮ, ವೃತ್ತಿಪರ ಮತ್ತು ಕೃಷಿ ಕ್ಷೇತ್ರಗಳಲ್ಲಿ ಅಮೋಘ ಸಾಧನೆ ಪ್ರದರ್ಶಿಸಿದ ಐದುಮಂದಿ ಕಥೋಲಿಕ್ ವ್ಯಕ್ತಿತ್ವಗಳಿಗೆ 2023-25ನೇ ಸಾಲಿನ ‘ರಚನಾ ಪ್ರಶಸ್ತಿ’ ಮಂಗಳೂರಿನ ಮಿಲಾಗ್ರಿಸ್ ಸಭಾಂಗಣದಲ್ಲಿ ಭಾನುವಾರ ನಡೆದ ವಿಜೃಂಭಣೆಯ ಕಾರ್ಯಕ್ರಮದಲ್ಲಿ ಪ್ರದಾನಿಸಲಾಯಿತು.
ಈ ಗೌರವವನ್ನು ಪಡೆದವರು:
• ವೃತ್ತಿಪರ ಕ್ಷೇತ್ರದಲ್ಲಿ: ಜೆ.ಆರ್. ಲೋಬೋ (ಮಾಜಿ ಶಾಸಕ)
• ಉದ್ಯಮ ಕ್ಷೇತ್ರದಲ್ಲಿ: ಆಸ್ಟಿನ್ ರೋಚ್ (ಬೆಂಗಳೂರು)
• ಕೃಷಿಯಲ್ಲಿ: ಡಾ| ಗಾಡ್ವಿನ್ ರೊಡ್ರಿಗಸ್ ಬೆಳ್ವಾಯಿ (ಮಂಗಳೂರು)
• ಅನಿವಾಸಿ ಉದ್ಯಮಿ: ಪ್ರತಾಪ್ ಮೆಂಡೋನ್ಸಾ (ದುಬೈ)
• ಮಹಿಳಾ ಸಾಧಕಿ: ಶೋಭಾ ಮೆಂಡೋನ್ಸಾ
ಮಾನ್ಯ ಇಂಧನ ಸಚಿವ ಕೆ.ಜೆ. ಜಾರ್ಜ್, ಮುಖ್ಯ ಅತಿಥಿಯಾಗಿ ಭಾಗವಹಿಸಿ, ಪ್ರಶಸ್ತಿ ಪ್ರದಾನ ಮಾಡಿದ ನಂತರ ಮಾತನಾಡುತ್ತಾ, “ಸಾಧನೆಯ ಪಥದಲ್ಲಿ ಹಲವರು ಪ್ರಯತ್ನಿಸುತ್ತಾರೆ, ಆದರೆ ಕೆಲವರ ಸಾಧನೆಗಳು ಸಮಾಜಕ್ಕೆ ಪ್ರೇರಣೆಯಾಗುತ್ತವೆ. ರಚನಾ ಸಂಸ್ಥೆ ಅಂಥವರನ್ನು ಗುರುತಿಸಿ ಸಕಾಲದಲ್ಲಿ ಗೌರವಿಸುತ್ತಿರುವುದು ಶ್ಲಾಘನೀಯ. ಈ ಪ್ರಶಸ್ತಿಗಳು ಸಮ್ಮಾನಿತ ವ್ಯಕ್ತಿಗಳ ಜವಾಬ್ದಾರಿಯನ್ನು ಹೆಚ್ಚಿಸುತ್ತವೆ,” ಎಂದು ಹೇಳಿದರು.
ಧರ್ಮಧ್ಯಕ್ಷ ಡಾ. ಪೀಟರ್ ಪಾವ್ಲ್ ಸಲ್ಡಾನ್ಹಾ, ವಿಧಾನ ಪರಿಷತ್ ಸದಸ್ಯ ಐವನ್ ಡಿಸೋಜಾ, ಕೆಥೋಲಿಕ್ ಚೇಂಬರ್ ಅಧ್ಯಕ್ಷ ಜಾನ್ ಬಿ. ಮೊಂತೆರೊ, ಉದ್ಯಮಿ ಜಾನ್ ಸುನಿಲ್, ಡಾ| ಸಿಂಥಿಯಾ ಮಿನೇಜಸ್ ಸೇರಿದಂತೆ ಹಲವು ಗಣ್ಯರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.
ರಚನಾ ಸಂಸ್ಥೆಯ ಕಾರ್ಯದರ್ಶಿ ವಿಜಯ್ ವಿ. ಲೋಬೋ, ಉಪಾಧ್ಯಕ್ಷ ನವೀನ್ ಲೋಬೋ, ಕೋಶಾಧಿಕಾರಿ ನೆಲ್ಸನ್ ಮೊಂತೆರೊ, ಹಾಗೂ ಸಂಘಟಕರಾದ ಯುಲಾಲಿಯಾ ಡಿಸೋಜಾ ಕಾರ್ಯಕ್ರಮದ ವ್ಯವಸ್ಥೆ ನೋಡಿ ಯಶಸ್ವಿಯಾಗಿ ನೆರವೇರಿಸಿದರು.
