ಮಂಗಳೂರು, ಅ.12:
ರಾಜ್ಯ ಸರ್ಕಾರದ ಬಜೆಟ್‌ನಲ್ಲಿ ಕಂಬಳ ಜಾನಪದ ಕ್ರೀಡೆಯಿಗಾಗಿ ರೂ. 2 ಕೋಟಿ ಅನುದಾನವನ್ನು ಮೀಸಲಿಡುವಂತೆ ರಾಜ್ಯ ಕಂಬಳ ಅಸೋಸಿಯೇಷನ್ ಮುಖ್ಯಮಂತ್ರಿ ಅವರಿಗೆ ಮನವಿ ಸಲ್ಲಿಸಿದೆ ಎಂದು ಸಂಸ್ಥೆಯ ಅಧ್ಯಕ್ಷ ಡಾ. ಐಕಳಬಾವ ದೇವೀಪ್ರಸಾದ್ ಶೆಟ್ಟಿ ತಿಳಿಸಿದ್ದಾರೆ.
ಮಂಗಳೂರಿನಲ್ಲಿ ಶನಿವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, “ಈ ಮೊತ್ತ ಮೀಸಲಾದರೆ, ರಾಜ್ಯದ 25 ಕಂಬಳಗಳಿಗೆ ತಲಾ ರೂ.8 ಲಕ್ಷದಂತೆ ಅನುದಾನ ನೀಡುವುದು ಸಾಧ್ಯವಾಗುತ್ತದೆ. ಇದರಿಂದ ಆಯೋಜಕರಿಗೆ ಸೂಕ್ತ ಯೋಜನೆ ರೂಪಿಸುವಂತೆ ನೆರವಾಗುತ್ತದೆ,” ಎಂದು ಹೇಳಿದರು.
ಈ ಹಿಂದೆ ಒಂದು ಕಂಬಳಕ್ಕೆ ರೂ.5 ಲಕ್ಷ ಅನುದಾನ ನೀಡಲಾಗುತ್ತಿತ್ತು. ಆದರೆ ಈಗ ಅದು ರೂ.2 ಲಕ್ಷಕ್ಕೆ ಕುಸಿತವಾಗಿದೆ. ಈ ಹಿನ್ನೆಲೆ ಪುನಃ ಅನುದಾನ ಹೆಚ್ಚಿಸಲು ಪುತ್ತೂರು ಶಾಸಕ ಅಶೋಕ್ ರೈ ನೇತೃತ್ವದಲ್ಲಿ ಸರ್ಕಾರಕ್ಕೆ ಮತ್ತೊಮ್ಮೆ ಮನವಿ ಸಲ್ಲಿಸಲಾಗಿದೆ ಎಂದು ಅವರು ತಿಳಿಸಿದರು.
ಸರ್ಕಾರದ ಅಧಿಕೃತ ಮಾನ್ಯತೆ
ರಾಜ್ಯ ಯುವಜನ ಸಬಲೀಕರಣ ಮತ್ತು ಕ್ರೀಡಾ ಪ್ರಾಧಿಕಾರದ ಮೂಲಕ ಕಂಬಳ ಅಸೋಸಿಯೇಶನ್‌ಗೆ ಈಗಾಗಲೇ ಅಧಿಕೃತ ಮಾನ್ಯತೆ ದೊರೆತಿದ್ದು, ಜಿಲ್ಲಾಧಿಕಾರಿಗಳಿಂದ ಅನುಮೋದಿತ ಪದಾಧಿಕಾರಿಗಳ ಪಟ್ಟಿ ಮಾನ್ಯವಾಗಿದೆ. ಮುಂದಿನ ಮೂರು ವರ್ಷಗಳವರೆಗೆ ಈ ಸದಸ್ಯರಿಗೆ ಅಧಿಕಾರವಿದೆ.
ಐಪಿಎಲ್ ಮಾದರಿಯಲ್ಲಿ ಕಂಬಳ?
ಮುಂದಿನ ವಾರ ಮಂಗಳೂರಲ್ಲಿ ನಡೆಯುವ ಕಂಬಳ ಸಮಿತಿಯ ಸಭೆಯಲ್ಲಿ ಈ ಬಾರಿಯ ಕಂಬಳಗಳ ಶೆಡ್ಯೂಲ್, ನಿಯಮಾವಳಿ, ಪ್ರಾಯೋಜಕತ್ವದ ಮಾದರಿ ಸೇರಿದಂತೆ ಹಲವು ಆಯಾಮಗಳ ಬಗ್ಗೆ ಚರ್ಚೆ ನಡೆಯಲಿದೆ. “ಐಪಿಎಲ್ ಮಾದರಿಯಲ್ಲಿ ಪ್ರಾಯೋಜಕತ್ವದಿಂದ ಕಂಬಳ ನಡೆಸುವ ಯೋಜನೆ ಇದೆ,” ಎಂದು ಶೆಟ್ಟಿ ಹೇಳಿದರು.
ಕಂಬಳ ಆಟಗಾರರಿಗೆ ಭತ್ಯೆ, ವಿಮಾ ಯೋಜನೆ
ಕಂಬಳ ಓಟಗಾರರು, ತೀರ್ಪುಗಾರರು ಹಾಗೂ ಕಾರ್ಮಿಕರಿಗೆ ಸರ್ಕಾರದ ಭತ್ಯೆ ಮತ್ತು ಆರೋಗ್ಯ ವಿಮಾ ಯೋಜನೆ ಆರಂಭಿಸುವ ಉದ್ದೇಶವಿದೆ. ಕಂಬಳ ಆಯೋಜಕರು ಅಸೋಸಿಯೇಷನ್ ಮೂಲಕವೇ ಅನುಮತಿ ಪಡೆದು ಕಂಬಳ ನಡೆಸಬೇಕು. ಇದರಿಂದ ಸರ್ಕಾರದ ಅನುದಾನ ಪೂರೈಕೆ ಸುಗಮವಾಗಲಿದೆ.
ಬೈಲಾ, ನಿಯಮಗಳು, ಧ್ವಜ ರೂಪಣೆ
ಕಂಬಳದ ಬೈಲಾ (ನಿಯಮಾವಳಿ), ಧ್ವಜ ಮತ್ತು ಲಾಂಛನ ರೂಪಿಸುವ ಪ್ರಕ್ರಿಯೆ ಈಗಾಗಲೇ ಪ್ರಾರಂಭವಾಗಿದೆ. ಕಾಲಕ್ಕನುಗುಣವಾಗಿ ನಿಯಮಗಳನ್ನು ಪರಿಷ್ಕರಿಸುವ ಜವಾಬ್ದಾರಿ ಅಸೋಸಿಯೇಷನ್‌ದ್ದಾಗಿದೆ.
ಸುದ್ದಿಗೋಷ್ಠಿಯಲ್ಲಿ ಕಾರ್ಯದರ್ಶಿ ವಿಜಯಕುಮಾರ್ ಕಂಗಿನಮನೆ, ಕೋಶಾಧಿಕಾರಿ ಲೋಕೇಶ್ ಶೆಟ್ಟಿ ಮುಚ್ಚೂರು ಉಪಸ್ಥಿತರಿದ್ದರು.
