ರಿಯಾದ್: ಕೊರೊನಾ ವೈರಸ್ ಸಾಂಕ್ರಾಮಿಕದ ಹಿನ್ನೆಲೆಯಲ್ಲಿ ಸುಮಾರು 17 ತಿಂಗಳ ಕಾಲ ತನ್ನ ಗಡಿಯನ್ನು ಮುಚ್ಚಿದ್ದ ಸೌದಿ ಅರೇಬಿಯಾ, ಇದೀಗ ಸಂಪೂರ್ಣವಾಗಿ ಲಸಿಕೆಗಳನ್ನು ಪಡೆದುಕೊಂಡ ವಿದೇಶಿಗರಿಗೆ ಗಡಿಗಳನ್ನು ಮತ್ತೆ ತೆರೆಯುವುದಾಗಿ ಘೋಷಿಸಿದೆ.
ಸೌದಿ ಅನುಮೋದಿಸಿದ ಲಸಿಕೆ ಕಂಪೆನಿಗಳಾದ ಫೈಜರ್, ಆಸ್ಟ್ರಾಜೆನಿಕಾ, ಮಾಡೆರ್ನಾ ಅಥವಾ ಜಾನ್ಸನ್ ಆಂಡ್ ಜಾನ್ಸನ್ ಲಸಿಕೆಗಳ ಎರಡೂ ಡೋಸ್ಗಳನ್ನು ಪಡೆದ ಪ್ರವಾಸಿಗರು ಸೌದಿಗೆ ಪ್ರಯಾಣಿಸಬಹುದು. ಅವರಿಗೆ ಯಾವುದೇ ಸಾಂಸ್ಥಿಕ ಕ್ವಾರೆಂಟೈನ್ ಅಗತ್ಯವಿಲ್ಲ. ಆದರೆ ಕಳೆದ 72 ಗಂಟೆಗಳ ಒಳಗೆ ಪಡೆದುಕೊಂಡ ಪಿಸಿಆರ್ ಕೋವಿಡ್ 19 ನೆಗೆಟಿವ್ ವರದಿಯನ್ನು ಮತ್ತು ತಮ್ಮ ವಿವರಗಳನ್ನು ಅಧಿಕಾರಿಗಳಿಗೆ ಸಲ್ಲಿಸಬೇಕು.
ಉಮ್ರಾಹ್ ಯಾತ್ರೆಯ ಮೇಲಿನ ನಿರ್ಬಂಧ ತೆರವುಗೊಳಿಸುವ ಬಗ್ಗೆ ರಿಯಾದ್ ಯಾವುದೇ ಪ್ರಕಟಣೆ ನೀಡಿಲ್ಲ. ಪ್ರತಿ ವರ್ಷ ಜಗತ್ತಿನ ಲಕ್ಷಾಂತರ ಮಂದಿ ಮುಸ್ಲಿಮರು ಈ ಯಾತ್ರೆಯಲ್ಲಿ ಭಾಗವಹಿಸುತ್ತಾರೆ. ರಾಜಮನೆತನವು ವಿದೇಶಿ ಪ್ರವಾಸಿಗರಿಗೆ ಬಾಗಿಲು ತೆರೆಯುವುದಾಗಿ ಪ್ರವಾಸೋದ್ಯಮ ಸಚಿವಾಲಯ ಪ್ರಕಟಿಸಿದ್ದು, ಪ್ರವಾಸಿ ವೀಸಾದಾರರ ಮೇಲಿನ ನಿರ್ಬಂಧವನ್ನು ತೆರವುಗೊಳಿಸಲಾಗುತ್ತದೆ. ಇದು ಆ. 1ರಿಂದ ಇದು ಜಾರಿಯಾಗಲಿದೆ ಎಂದು ಸೌದಿ ಪ್ರೆಸ್ ಏಜೆನ್ಸಿ ವರದಿ ಮಾಡಿದೆ.